【有氣泡就係香檳？】節慶開P一定係揀佢？氣酒入門同你睇！

2018-06-14

咪以為酒只係一種小眾嘅玩意，其實佢一直都係不少上班族嘅最愛，除咗有紅酒白酒之外，自問係入門級愛酒人嘅你不妨試下氣酒！氣酒（Sparkling Wine）酒如其名，酒入面有氣泡，感覺同汽水相當相似，好多人都會以為所有氣酒都係香檳，其實氣酒仲有好多種類，想學下做內行人嘅你即刻嚟睇下！

氣酒嘅出現就要由釀製氣酒嘅過程開始講起啦，二氧化碳喺釀酒嘅過程之中喺氣酒瓶或者酒桶之內發酵形成，令氣酒出現氣泡，入口口感就好似汽水一樣。因此好多人都會覺得氣酒容易入口。

因為有氣泡，感覺輕快嘅氣酒一般會用作餐前酒或者搭配較油膩、或酸度較高嘅食物。所以你除咗可以喺派對嘅正餐前見到氣酒，用氣酒搭配邊爐一樣都襯到十足！

含有二氧化碳嘅氣酒會出現POP一聲，非常有節慶氣氛，因此唔少人都會選擇用氣酒慶祝各種喜事或者派對。

唔少國家都有出產氣酒，最常見有以下幾種：

1．Prosecco

Prosecco係來自意大利嘅氣酒，以Glera品種嘅葡萄釀造，但亦可以包含小量其他品種，呢一種氣酒主要喺Veneto同埋Friuli Venezia Giulia區釀造，因為價錢比香檳更加大眾，Prosecco係唔少雞尾酒嘅材料之一。

2．Cava

Cava呢一種氣酒來自西班牙，主要喺Catalonia出產，根據氣酒嘅甜度（Level of Dryness）可以分為Brut、Sec、Seco、Semisec、Semiseco、Dolç、Dulce（以最低甜度到最高甜度排列），嚐甜嘅你可以喺選購氣酒嘅時候多啲留意佢嘅甜度！

3．Moscato

Moscato係主要以Muscat呢一種葡萄釀造嘅酒，但並唔係所有Moscato都係氣酒，只有Sparkling Moscato先係氣酒呀！甜度同樣有低有高，好似以下呢一支就會比較甜，果香都相對較濃。

4．Champagne

相信講起氣酒，最出名嘅一定係人人都識嘅Champagne，但留意返！千祈咪認錯有氣就係香檳，能夠叫做香檳嘅氣酒只有喺法國Champagne區出產嘅氣酒，而且仲必需係喺嚴謹製度下釀製嘅先可以帶住呢個名呀！因為製造過程嚴謹，所以Champagne價位都會比較貴。

以上咁多種氣酒其實都只係冰山一角，想知道更多甚至自己親身試下啲氣酒？即刻Like我哋Facebook個Page，留意我哋最新優惠！