圖中嘅建築正名係：博訥主宮醫院 (Hôtel-Dieu Museum / Hospices de Beaune)。

相信中意 Burgundy 嘅大家都一定聽過「醫院酒」，呢啲酒係由 Beaune 市中心入面嘅  Hospices de Beaune 所釀造，呢間醫院幾百年前就係專門為窮人治病嘅一個慈善機構，到咗今日就成為遊客必到嘅博物館。話說當年，英法百年戰爭以及「黑死病」令到 Beaune 嘅人民非常貧窮，於是當時嘅布根地公爵首席大臣 Nicolas Rolin 以及佢嘅第三任妻子 Guigone de Salins 於1443年成立 Hospices de Beaune，專為貧苦嘅人民提供醫療服務。

1457年，Guillemette Levernier 捐獻第一塊葡萄田俾醫院，之後捐葡萄田就變成一個傳統。500多年嚟，醫院已經接收大約60公頃葡萄田，有85%為特級田 Grand Cru 及一級田 Premier Cru。葡萄每年9月頭收成，釀好嘅「醫院酒」會於同年11月的第三個星期日進行拍賣，拍賣以228公升木桶作為單位，可裝288單瓶。而呢個法國葡萄酒界嘅年度盛事，由1859年至今已經舉辦咗160屆（2021年11月21日為161屆），收益全數捐贈俾醫院以及其慈善工作。